جريدة الدائرة الحمراء فى قلب الحدث
مقالات مشابهة
بقلم: الشناوي مصطفي
انا المواطن يا حكومة….
*******************
– أنا المواطن اللي .. أدفع عشرة الاف جنيه في سنتر دروس خصوصية وعشرين الاف جنيه في المدارس خاصه . وما ادفعش خمسه جنيه في مدرسة حكوميه .. بس اهم حاجه .. اشتكي ان التعليم بايظ
– أنا المواطن اللي .. أدفع خمسة ولا عشرة جنيه في التوكتوك لأخر الشارع . وما أدفعش سبعة جنيه في المترو اللي من اول الخط لأخره
أنا المواطن اللي .. أدفع ٥٠ جنيه في الميكروباص . ومادفعش تمن تذكرة القطار لنفس المسافه وازوغ من الكمسري ولو حبوا يغلوها اخرب الدنيا .. ولما القطار يعمل حادثه اشير واهبد وكان احنا البلد الوحيدة اللي فيها حوادث
– أنا المواطن اللي .. أدفع كل يوم ٢٥ جنيه علي القهوة وأدفع ٢٥ جنيه كل يوم علبة سجاير وأدفع ٢٠٠ ولا ٣٠٠ عشوة انا وصاحبي . واتخانق على بطاقة التموين أم ٥٠ جنيه في الشهر
– أنا المواطن اللي .. أدفع فاتورة تليفون بألف جنيه . وعايز عيش مدعم من الدولة بشلن ولو البطاقه وقفت اخرب الدنيا واتحسبن علي كل المواقع والجروبات
– أنا المواطن اللي .. ساكن في شقة في مصر الجديدة بعشرين جنيه أو علي النيل في شارع عبد العزيز آل سعود بالمنيل بخمسة وعشرين جنيه قانون قديم واصرخ لو فكرنا نرفع الايجار . وادفع ٩٠٠ جنيه جراج للعربية في نفس الشارع اللي ساكن فيه
– أنا المواطن اللي .. أدفع ٢٠٠ ولا ٣٠٠ جنيه في عيادة طبيب ولا في مستشفي خاصه . ومادفعش تمن تذكرة ب خمسة جنيه في مستشفي حكومه ولا جامعي وتأمين صحي علشان الحكومه المفروض تعالجنا ببلاش
– أنا المواطن اللي .. أدفع رشوة وأجيب ١٠٠ واسطة علشان اتعين في الحكومة واتثبت على درجة . وبعد ما اتثبت ازوغ واخرب الدنيا علي السوشيال مديا علي إن المرتب مابيكفيش وإن الشغل علي قد فلوسهم ويحمدوا ربهم اني بروح اصلاً
– أنا المواطن اللي .. بعد ما توظفت اقعد في المكتب ارازي في خلق الله طول اليوم واعطل المراكب السايرة علشان امد ايدي للي يسوى واللي مايسواش بمزاجه وغصباً عنه علشان مصلحته تمشي . واول ما أسمع الاذان انط أتوضي علشان الحق الصف الاول واضيع فيها يجي ساعتين
– أنا المواطن اللي .. أسرق كهرباء واخد وصلة من العمومي وأشغل التكييف من بره العداد وانور دكاني و نصبتي . ولما تيجي الحكومة تهد النصبة وتقطع الوصلة ..اقول الحكومه بتيجي علي الغلابه وحسبي الله ونعم الوكيل فيكم ياظلمة
– أنا المواطن اللي .. أبني على أرض مش بتاعتي واعلى أدوار مخالفة وادفع رشاوي لبتوع الحي وبتوع الميت ولكلاب السكك . ولما الدولة تقول لأ ما ينفعش وتهد اللي بنيته اتظاهر وامنع القوات و السلطات واقول الحكومه باعت للامارات وادعي عليها واطلب من ربنا ينتقم منها
– أنا المواطن اللي .. بخلف خمسة وسته عيال علشان اجيب الواد واخاوي البنات وانا اصلاً ماحلتيش اللضا بس كل عيل بيجي برزقه . ولما الحكومه تعمل حملات توعيه وموانع الحمل في الواحدات اتريق واروج اشعة ان الحكومه حاطه الموانع في العيش والشاي .. وعايز الحكومه تربيهم وتعلمهم وتعالجهم وتفليهم وتطقطق صوابعهم
– أنا المواطن اللي .. برمي الزباله في الشارع في اي حته . وارجع اشتكي ان البلديه مش شايفه شغلها وان اكوام الزباله في كل حته
– أنا المواطن اللي .. كل عيل من ولادي ماسك موبايل وسابيهم للسوشيال مديا . وارجع اشتكي من قلة ربايه وسفالة الجيل المنيل
أنا المواطن يا حكومة….
