لا تتوقع من أحد أن يكون مثلك

مقالات مشابهة

موميسات الإخوان بعد التظاهر أمام السفارة المصرية في تل ابيب

‏6 أيام مضت

مع السلامة للراجل اللي مش حنين ..

‏3 أسابيع مضت

كفرالشيخ.. راح المحامى ضحية بسبب الخلط بين الخصومة القانونية والعداوة الشخصية

4 يونيو، 2025

كتبه: هيثم حمدى

من عشرين سنة كده كنت بدي البواب مفتاح العربية كل أسبوع عشان ينضفها من جوه.. هوب فوجئت انه بياخد بيها لفة تلت ساعة قبل ما يرجع لي المفتاح.. (اكتشفت الموضوع ده عشان لما العربية بتدور فالموبايل بيشبك على بلوتوث العربية ويديني تنبيه)..

طبعا شعور لا يوصف وأنا حاسس اني بتقرطس.. ولو اتخبطت واللا عطلت مش هو اللي هيحاسب.. وياريت كده وبس ده كمان لو عربيتي اتعملت بيها أي مصيبة جريمة مثلا أنا اللي هشيلها.. دي مخاطرة لا تحتمل..

لما اكتشفت الموضوع استنيته في الشباك وناديته وهو بيركن طلع لي فتحت وشه أصفر قلت له هات المفتاح ومافيش تعامل بيني وبينك تاني عشان خيانة الأمانة..

بس عشان ما زعقتش ولا عملت مشكلة لقيت نفسي لسه مش مرتاح.. ما هديتش.. القرطسة اللي بقالها فترة وخيانة الأمانة والجرأة للدرجة دي.. الشحنة ما خرجتش..

العصر كنت عند كهربائي السيارات من سنّي وصديق منطقة ومحله جنب البيت.. فبقول له تصدق حصل كذا كذا كذا والراجل خان الأمانة مع ان بنعامله ازاي وبنعمل معاه ايه.. بحكي وأنا لا زلت مستغرب وتحت تأثير الصدمة والضيق..

لقيته بيقول لي وهو مستغرب من استغرابي: وفيها ايه يا باشمهندس.. من نفسه.. عايز يجرب الحياة اللي انتو عايشينها ويعيش له ربع ساعة كل أسبوع.. سألته بتتكلم جد واللا بتهزر؟ فوجئت انه بيتكلم جد واللي زاد كمان انه اتضايق مني عشان اتضايقت..

صدمتي في الكلام ده كانت أكبر من صدمتي في التصرف الأساسي.. حسيت فجأة مافيش منطق في الحياة..

بس وانا ماشي من عنده لقيت نفسي بسرح في حاجة هونت عليا ووصلتني للمنطق في اللي حصل..

صديقي الكهربائي بعد ما بيقلع العفريتة آخر اليوم ويلبس لبسه الشيك بيروّح بعربية زبون.. كل يوم تقريبا بيروح بعربية شكل.. جزء من السبب انه عادي يسوق عربيات الزباين عشان يجربها بعد ما يصلحها أو يجربها ويعرف عطلها.. بس مع الوقت ومع ان الموضوع متاح بقى عادي بيروح بيها وييجي بيها.. مع ان دي خيانة أمانة برضو..

حقيقة الأمر ان الكهربائي لما رد عليا كان بيدافع عن نفسه مش عن البواب..

الفهم ده ريحني جدا.. لما بيكون فيه موضوع بيتناقش على السوشال ميديا والصح والغلط فيه واضحين.. والاقي ناس بتدافع عن الغلط بشكل اللي هو مستحيل يكون بيمثل ده بيتكلم جد.. ولدرجة بعض الناس ممكن يشكوا في نفسهم.. بس مش بستغرب.. ايوه ما هو أصلا بيعمل الغلط فشايفه عادي.. مهما كان غريب مهما كان غير مقبول مهما كان فيه من مساوئ..

مرجعك انت عارفه ومتأكد منه وفخور انك متمسك بيه وعايش بيه.. بس ما تتوقعش ان الناس كلها كده.. فيه منهم اللي مرجعه غير.. وفيه اللي مرجعه زيك بس مش مفعله في حياته.. لا ده يهزك ولا ده يهزك..