الثلاثاء , 7 فبراير 2023
الرئيسية » أخبار الصحة » “كارثة” إعتراف ٠٠٠ كبابجي متقاعد ٠٠٠

“كارثة” إعتراف ٠٠٠ كبابجي متقاعد ٠٠٠

كتب: السيد عنتر

النهارده وانا قاعد علي البحر قابلت راجل كبير محترم اتعرفت عليه وطلع صاحب محل كباب وكفته من 35 سنه وحاليا ولاده كل واحد عنده محل والدنيا تمام .

المهم سألته ياحاج ايه حكايه الكفته وازاي اعرف الكفته الحلوه من الكفته المضروبه.؟

اسمع الرد :

ياباشا كل الكفته برا البيت مضروبه حتي اكبر محلات الكباب في مصر – الا من رحم ربي- بتشتري من مصدر واحد (المذبح) هناك فيه معامل تحت السلم بتعمل أكياس ١٠ كيلو كفته يبدأ من 30 جنيه للكيلو لغايه 100 جنيه للكيلو فرحت وقولتله تمام يبقي المحلات الكبيره بتشتري انظف حاجه ابو 100 جنيه رد عليا وقالي بلاش تعرف المعامل ده بتعمل الكفته من ايه، ابو 30 بيحطوا حته دهن علي كل كيلو، وابو ١٠٠ ممكن يحطوا ديل ولا عظم مفروم، اما الباقي ده مش لحمه اصلا، ولا بقري ولا جاموسي ولا ضاني.

انا خايف من ربنا قوي، ياعالم مين اكل من عندي ومات، ولا عاش، تصدق يابني مره عملت كفته نظيفه، لحم ودهن من الجزار طبيعي، عارف النتيجه، بعت 15 كيلو، رجع منهم حوالي 12 كيلو، بيقولوا وحشه، وفيها حاجه غلط، الظاهر اننا اتعودنا علي البلاوي والميكروب..

الرسول قال ياباشا لعن الله شاربها وحاملها وبايعها وساقيها، دي الخمر، فمابالك بالسم الهاري اللي اسمه كفته …اوعي ياباشا تشتري كفته او لحوم من اي حد برا البيت وبلاش لحوم مصنعه خالص .

يابيه كل اللي بيشتري كفته وحواوشي ابو خمسه جنيه عارف، وزيد عليهم اللي بيروح يدفع 450 في كيلو الكفته، وفاهم انه كده امان، بالعكس ابو 450 نفس المصدر، ويزود علي الكيلو حته دهن او ليه، عشان يقولك ضاني

امال ليه بيبيعوا ب 400 جنيه الكيلو ؟

منظره ياباشا، الإيجار والديكور والاغاني، علي حسابك، هو مش فيه كبايه شاي ب ٥ جنيه، وكبايه شاي ب ١٠٠ جنيه ؟

*بجد ٠٠٠ الراجل ده ابهرني ٠٠٠*

شاهد أيضاً

ردا على إساءتهما… الأزهر يدعو لمقاطعة المنتجات الهولنديَّة والسويديَّة

نقله: سها عزت  طالب الأزهر الشريف الشعوب العربية والإسلامية بمقاطعة جميع المنتجات الهولندية والسويدية بكافة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *