الجمعة , 29 مارس 2024
الرئيسية » أخبار الشباب و الرياضة » قفشة نجم ابن أصول

قفشة نجم ابن أصول

نقله: على الراعي

– مين اللي سماك أفشة ؟
دا سؤال وجهته لميس الحديدي لمحمد مجدي أفشة
فضحك وأخذ يحكي ببساطة :
– وانا صغير كنت بنزل أشتغل مع أمي في السوق
أمي كانت بتبيع فراخ
– اشتغلت في السوق ؟
– اشتغلت في السوق وفي المحارة والأرض وبتاع كاوتش وكل حاجة الحمد لله
عرفت ان ده راجل متربي على إن الشغل مش عيب
الشغل نعمة لما تتكلم عنها تقفل الجملة بـ : الحمد لله
أفشة كمل حكايته عن سبب التسمية وقال إن مرجعه أفش الفراخ اللي والدته كانت بتربيها وتنزل تبيعها في السوق بمساعدته
حكي ببساطة بدون أي اعتبار لأنه نجم وبيتدفع فيه ملايين وبيقبض ملايين
حكي وعلى وشه ابتسامه كلها حنين للماضي وفخر باللي حققه
حكي عشان نعرف إنه لسة باقي على أصله وفخور بمنشأه
وقبل الكلام عن سر أفشة اتسأل :
– ساكن فين ؟
– في قرية هنا اسمها قنبرة جنب ناهية
– بتحب تحتفل مع مين ؟
– مع أهلي وأهل قريتي لأنهم أكتر ناس هيفرحولي
– حصلك مشاكل مع أهلك بسبب الكورة
– كانوا نفسهم أكمل تعليمي بس أنا كنت مصمم
– عملت إيه لوالدتك لما ربنا كرمك ؟
– أي حاجة نفسها فيها الحمد لله عملتهالها إلا حاجة واحدة بس هي العمرة
كل ماجي اعملها تقولي بلاش دلوقتي عشان جواز أخوك
بلاش دلوقتي عشان مش عارفة إيه
بس الحمد لله جه الوقت وأول ما الدنيا تبقى كويسة هطلعها

ودخلت الحاجة أم أفشة في مداخلة هاتفية
ست بمجرد ما تسمع صوتها هتعرف ليه أفشة متواضع ومحافظ على أصوله
بمجرد ما تسمع مفرداتها هتعرف إن أفشة إبن ناس ومتربي
ست فيها بساطة أمك وأمي وكل أم مصرية على سجيتها
سألتها لميس :
– كنتي عاوزاه يلعب كورة من الأول يا حاجة ؟
– انا كان نفسي يتعلم هو واخوه عشان انا وابوه ما اتعلمناش
– انتي تعبتي كتير يا حاجة
– تعبي كله راح لما شوفت محمد في التلفزيون وأي حد بيتكلم عن محمد كلام كويس ببقى هاين عليا احضنه وابوسه
أنا مابسمعش حاجة عالتلفزيون غير حاجتين : القرآن والماتش

في نهاية المكالمة لميس قالت لأفشة :
– قول حاجة لامك بقى يا أفشة
– هي قالت كل حاجة هي بالنسبالي كل حاجة
وسألت والدته :
– بتطلبوا منه حاجة وما بيعملهاش ؟
– لا دا من يومه وهو الحمد لله طوع
– يعني النجومية والفلوس ما غيرهوش ؟
– لا.. محمد لا.. دا بيزيد حنية كمان وكمان. تؤ تؤ تؤ.. عندي الحمد لله طه ومحمد أكتر من حنية البنات على أمهم.

شاهد أيضاً

شباب كفر الشيخ تشارك بـ أسبوع المشورة المهنية بـ دمياط الجديدة

نقله:سها عزت شاركت مديرية الشباب والرياضة بـ كفرالشيخ في أسبوع المشورة المهنية «التخطيط والتطوير المهني» …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *