الثلاثاء , 19 مارس 2024
الرئيسية » أقلام وأراء » الأب الضال: اتمنى الواى فاي يتعطل وأسرتى ترجعلى

الأب الضال: اتمنى الواى فاي يتعطل وأسرتى ترجعلى

بقلم: محمد صلاح ابوعمر


امبارح الراوتر وقع على الأرض والواى فاي توقف عن البيت كله….. قلت خير وبركة افك شوية من النت .
خرجت من غرفتي وعملت كوباية شاى وقعدت في الصالة .. شوية ولاقيت ابني خارج من غرفته ، واول ما شافني احضان وبوس وعمل شاى وقعدنا ندردش شوية .. اخبارك ايه يا بني وخطبت ولا لسه وشغال فين و..و… راح مقاطعنى وقال: سيبك من اخبارى ، حضرتك عامل ايه ، واجازة النهاردة من الشغل ولا مزوغ؟
قلت له : لا … ده انا طلعت معاش من سنتين ، وانت فين دلوقتى؟ قاللى انا اتخرجت ودخلت الجيش وقربت أخلص. حضرتك وحشتنى يابابا بس والله شكلك متغيرش كتير عن زمان .. هي بس شوية الشعر الابيض .
المهم ، القعدة طولت وخرج إبني الصغير من اوضته وانضم للقعدة … شوية وجرس الباب رن لقيت ابني الكبير داخل هو ومراته وابنه الصغير (حفيدي) انا كنت ناسيهم
ما شاء الله ، ابني الكبير اتخرج واشتغل ، وآخر العنقود اللى لسه كنت مقدم له في الحضانه بقي في الاعداديه .
المفاجأة الحلوة بقي لما لاقيت باب غرفة مراتي بيزيق وبيفتح بالعافية ، وشوية ولاقيت مراتي جنبي وهاتك يابوس وعياط… انت هنا في مصر؟ وانا معرفش؟
انا فاكراك لسه في الشغل ..
قلت لها … انا طلعت معاش من زمان
بس انتى ما شاء الله عليكي وكأن الزمن ملوش دعوة بيكي.
لسه كانت مراتي بتقترح نتغدا سوا بالمناسبة الحلوة دى ، لكن يا خسارة .. اشارة الواي فاي رجعت ، وسلمنا على بعض وكل واحد رجع اوضته .
وانا كنت بفكر ناخد صورة جماعية للذكري
ابنى قال لي مفيش وقت واقترح كل واحد ياخد صورة سلفي لنفسه ويبتعها له ، وبالفوتوشوب هو يبقى يعمل لها مونتاج وتبقى جماعية .
والله طلعوا ناس طيبين …
بتمنى ان الواى فاي يتعطل على طول ونرجع لبعضينا❤️🤗

شاهد أيضاً

لجنة الحريات بنقابة الصحفيين تطالب محافظ كفرالشيخ بتسهيل مهمة الزملاء الصحفيين ووقف حجب المعلومات

كتب: سيف محمد سيف  طالب الأستاذ محمود كامل، وكيل نقابة الصحفيين للحريات، اللواء جمال نور …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *