جريدة الدائرة الحمراء فى قلب الحدث
مقالات مشابهة
بقلم: مهندس محمد الشربينى
لما سعادتك تكتشف ان نظرك ضعيف هتروح لدكتور يعمل لك نظارة والا هتشترى عصاية تمشى بيها فى الشارع ؟ الحقيقة احنا بنفضل الحل الثانى
لما ابنك مايعرفش يحل مسألة المفروض تحاول تشرحها له وازاى يحلها والا تضربه عشان يحلها ؟ الحقيقة ان احنا بنفضل الحل الثانى
لما تكون بدلتك واسعة عليك تروح لترزى يضبطها على مقاسك والا انت تاكل عشان تتخن والبدلة تبقى على مقاسك ؟ الحقيقة احنا هناكل عشان نتخن
الأمثلة كثيرة لاختيارنا السىء للحلول الممكنة لمشاكلنا الحياتية
لو انت حددت المطلوب جيدا لازم تعرف وتتأكد ان الأهم هو ايجاد الحل الأفضل والمناسب لتحقيق هذا المطلوب
وعلى ضوء ذلك نسأل نفسنا سؤال بسيط جدا — هو إيه اللى احنا عاوزينه من عضو مجلس النواب ؟
فى كل بلاد العالم المتقدم مطلوب من عضو مجلس النواب
أولا — عمل التشريعات والقوانين التى تساعد المجتمع على تحقيق الأمن بمعناه العام وتحقيق العدالة الاجتماعية الى اقصى مايمكن تحقيقه — ومساعدة الحكومة لتحقيق افضل النتائج الممكنة
ثانيا — مراقبة اعمال الحكومة والتأكد من حسن آداء المسئولين فيها وتصحيح اى انحرافات عن الأهداف المرجوة منها لصالح الوطن والمواطن
يعنى مطلوب منه بحث حلول للمشكلات العامة وليس التدخل بصورة غير قانونية او غير اخلاقية لحل مشكلات خاصة
مطلوب منه البحث عن حل لمشكلة البطالة وليس توظيف أهله او أقاربه او داعمين او مريدين له
مطلوب منه ايجاد حلول لمشكلات المرأة العاملة وليس نقل بنت خالته من الحامول لبيلا
مطلوب منه تقديم طلبات احاطة عن اسباب عدم تنفيذ مشروع تم اقراره واقرار ميزانيته وليس الوقوف على ايد المقاول عشان يشد حيله فى استكمال المشروع
مطلوب منه بحث مشكلات اجتماعية من عينة انتشار عمليات الطلاق وليس قتل المأذون
مطلوب منه أن يبحث مشكلة خطف الأطفال او الاعتداء عليهم وليس مواساة اهاليهم
طيب ايه المطلوب مننا احنا بقى ؟ المفروض نبحث عن شخص مؤهل علميا وسياسيا وفهما وله خبراته ويمكنه فعل ذلك وليس من الضرورى ان يكون قريبى او صديقى او ابن قريتى او لنا مصالح معه وهكذا
وعشان كده لما سألوا أحد الحكماء أيهما أولى أن يحكم التقى أم البارع ؟ قال بل البارع — لأن التقى تقواه لنفسه فقط — أما البارع فبراعته تنفع الناس جميعا
يبقى الحل فى ايدينا احنا — ضعيف النظر نعمل له نظارة — ووالمفروض أشرح لابنى ازاى يحل المسألة مش أضربه — وأودى البدلة للترزى يضبطها على مقاسى مش آكل عشان أتخن وتبقى على مقاسى
ورحمة عساكر ست محمد الدقن مافى حاجة من دى معمولة لان وببساطة احنا بنعشق الشكوى من الظروف وان شالله المشكلة ماأتحلت — وللأسف مش عايزين نعترف ان احنا اللى بنصنع هذه الظروف سواء بنصنعها بمزاجنا او بنصنعها بغبائنا
ولو اتكررت الانتخابات البرلمانية مليون مرة هتلاقى السيناريو واحد — الحماس والتعصب لقريب او صديق او ابن البلد — وبعد ماينجح نردد نفس الكلمات الشهيرة — هو عمل لنا ايه ؟ هو وظف اولاده وقرايبه — مابنشوفوش — راح قعد فى القاهرة وقال عدولى
وانا باقول لك انت السبب ومش هتتغير — الا اذا عرفت فعلا ايه المطلوب حقيقة من عضو مجلس النواب — ومين الشخص المناسب الذى يحقق هذا المطلوب
ولحد مانوصل للمستوى السياسى الراقى ده مطلوب مننا كلنا نحفظ أغنية ظلموه.
