جريدة الدائرة الحمراء فى قلب الحدث
مقالات مشابهة
اعده: هيثم حمدى
مقارنة بين اكبر قصر فى الدنيا و قصر اقل واحد فى الجنة ؟!!
من كام يوم كنت بتفرج علي تصوير لقصر في دبي تمنه ١٠٠ مليون دولار … .. مع انه مكانش كبير أوي يعني..
ولكن جالي فضول أشوف القصور الكبيرة في العالم ..
ولقيت ان أكبر قصر سكني في العالم هوا قصر سلطان دولة بروناي .. وتقريبا القصر دا فيه مئات الغرف و أحواض السباحة و و و و
مساحة القصر كله ٢٠٠ كيلومتر .. وطبعا أكيد القصر دا تمنه أغلي من ميزانية دولة كاملة
لكن السؤال بقا…
لو هنقارن القصر دا بقصر من قصور أقل واحد في الجنة ؟ هل القصر دا يعتبر قصر كبير فعلا ؟
احب اقولك انك لو هتقارنه بقصر من قصور الجنة لا يساوي طوبة واحدة في بلكونة من البلكونات بتاعت قصر الجنة..
اسمع يا صديقي :
سيدنا النبي قال عن أقل واحد في الجنة :
” وَيُنْصَبُ لَهُ قُبَّةٌ مِنْ لُؤْلُؤٍ , وَيَاقُوتٍ , وَزَبَرْجَدٍ , كَمَا بَيْنَ الْجَابِيَةِ إِلَى صَنْعَاءَ ” .
يعني يتبني له قصر مصنوع من لؤلؤ وياقوت وزبرجد ( اللي انت عمرك ما شوفته ولا هتشوفه ) مساحة القصر دا من مدينة الجابية لحد مدينة صنعاء،
الجابية : مدينة في سوريا.
صنعاء : مدينة في اليمن.
المسافة بينهم في خط مستقيم تقريبا ٢٠٠٠ كيلو،
القصر علي هيئة قُبَّةٌ, يعني القاعدة بتاعته تقريبا دائرية ،
لو هتحسب مساحته تقرييا هتبقي :
ط نق٢ : ٣.١٤ × ١٠٠٠ × ١٠٠٠ = ٣١٤٠٠٠٠٠ كيلو متر ،
يعني مساحته تقريبا ١٥ ألف ضعف مساحة أكبر قصر اتبني علي وجه الأرض،
متخيل المساحة الرهيبة ؟
طبعا لو هنقارن قصر الجنة بالقصر المسكين بتاع دبي هيكون أكبر منه بملايين المرات..
يكفي انك تعرف ان مساحة قصر الجنة أكبر من مساحة دبي كلها والإمارات كلها والسعودية كلها واليمن وعمان وقطر والبحرين والكويت والعراق وسوريا والأردن وفلسطين ونص البحر الأحمر والخليج العربي وحتة من إيران كمان ، كل الدول دي داخلة في مساحة قصر من قصور أقل واحد في الجنة.
تخيلت ؟
دا طبعا من حيث المساحة بس
أما من حيث البناء والتصميم والفخامة والديكور .. فطبعا مفيش أي تشابه …
يكفي انك تعرف ان قصر الجنة مفيش مهندس صممه ولا عامل اشتغل فيه..
ولكن اللي أبدعه وبناه ووضع فيه كل وسائل الراحة والترفيه والمتع والنعيم والديكور والأبواب والشبابيك والبارات والكراسي والسراير والستاير والفرش والمخدات والخداديات والإضاءات والألوان والروايح : هوا الله رب العالمين اللي خلق وأبدع الكون كله..
تخيل بقا لما تصميم قصرك يكون من اختيار رب الأكوان سبحانه وتعالي.. يكون القصر عامل ازاي ؟
العجيب ان دا قصر من قصور كتيرة بتاعت أقل واحد في الجنة ؟
فما بالك بأحباب وأولياء ربنا سبحانه وتعالي ؟
اوعي الشيطان يخليك تكسل عن صلاة ١٢ ركعة سنن في اليوم عشان يتبنيلك قصر في الجنة ، ولو فاتك حاجة منهم عوضها قبل ما تنام.
وأعلي من كدا إنك تبلغ كل الناس اللي حواليك بالأجور دي فتاخد جايزتين : أولا تتشبه بسيدنا النبي في تبليغ الدين فتكون معاه في الجنة.
ثانيا : كل واحد من الناس هيعمل بأي حاجة من الكلام اللي هتبلغه هيكون في ميزان حسناتك، وبدل ما يتبني ليك ١٠٠٠ قصر مثلا، يتبني ليك ملايين القصور
ملحوظة أخيرة :
الدايرة الحمرا اللي في الصورة عبارة عن تخيل لمساحة القصر مبنية علي المعلومات اللي في الحديث ، والله تعالي واسع العطاء .
والنقطة الحمرا اللي السهم بيشاور عليها هي مدينة دبي
بص وتخيل
