جريدة الدائرة الحمراء فى قلب الحدث
مقالات مشابهة
كتب: احمد حافظ
= سيادة المحافظ: حضرتك عارف اللي عمله وزير التعليم النهاردة لما استقبل الاتنين مديرين مدارس اللي حضرتك أهنتهم قدام الكاميرات وكرمهم وجبر بخاطرهم ده معناه إيه؟!.. معناه إن الرسالة دي من الدولة.. مش من وزير التعليم بس.. من الدولة نفسها.. بس وزير التعليم اللي وصل لك الرسالة.. عارف ليه؟!.. لأنه وزير التربية قبل التعليم.
= بمناسبة التربية اللي الدولة بتوصلهالك.. يعني لا تهين معلم.. ولا تقلل من معلم.. ولا ينفع تستعرض على معلم.. ولا تتمنظر على معلم.. ولا تكلم مدير مدرسة بأسلوب وضيع.. ولا تتصيد أخطاء مديرين علشان تقدمهم للناس بصورة معيبة.. ولا تتلفظ بكلمة خارج سياق الأدب مع معلم.. هي دي التربية قبل التعليم.. علشان كدة كان التكريم وجبر الخاطر ورد الاعتبار برسالة من وزير التعليم.
= انت تعرف إن مدير المدرسة أبو جلابية اللي حضرتك قللت منه وقلت له انت شخص مهمل ولازم تمشي وهتمشي وقلت لوكيل الوزارة قدام الكاميرات ده مهمل ولازم يمشي؟!.. هيكمل في نفس مدرسته مدير مدرسة معزز مكرم ولا حد هيقدر يجي جنبه.. صدقني زي ما بقولك كدة: مش هيمشي والإقالة اللي انت عملتها على الهواء قدام الكاميرات.. حبر على ورق.
= يعني المدير مش هيمشي؟!.. لا يا سيادة المحافظ مش هيمشي.. المدير مكمل في نفس مدرسته.
= تاخد التقيلة؟!.. خد التقيلة يافندم.. الوزير مش هيقابل مدير المدرسة الفاضلة صالحة.. إلا وفيه تقارير بتأكد ١٠٠٪ إنها دفعت من مالها الخاص على صيانة بعض الحاجات في المدرسة.. يعني مديرة جدعة أصيلة بنت بلد بحق.. إنما كلامك امبارح انها مقدمتش ما يثبت انها دفعت وصرفت.. ده كلام مش مسئول.. اللي بقولهولك حصل وموثق.. بس هي ست عظيمة وعندها أصل ومقالتش ولا كانت هتقول لكن شافت قدامها محافظ مش محافظ على صورتها ومكانتها فكان لازم ترد.. وردت بالحق.
= تاخد الأتقل من كل ده؟!.. حضرتك قولت إنك قررت إقالة مدير الإدارة التعليمية بعد الجولة علشان مقصر في عمله ومكنش فيه استجابة لمطالب مديرة المدرسة.. طب إيه رأيك إن حركة تغيير وإقالة بعض مديري الادارات عندك في المحافظة- ومنهم مدير الادارة ده- وقرار رحيله من منصبه.. متاخد من قبل الجولة بتاعتك بأسبوع.. هتقولي محصلش.. هقولك حصل: اسمع مني أنا.. الراجل أصلا معروف ومتحدد إنه ماشي من أسبوع يعني مش انت اللي شيلته بعد الجولة بسبب التقصير.
= أخيرا.. اللي عمله وزير التعليم من استضافة وتكريم وتمجيد في مدير المدرسة ومديرة المدرسة.. مش تخبط ولا حكومة بتضرب في حكومة ولا الهبل ده خالص.. ده درس في التربية بتعمله مؤسسات محترمة وأمينة جوة الدولة بطريقة تبدو أكثر حدة للمسؤول غير المنضبط.. اللي هو يعني هديك درس وهخليك عبرة من غير ما أشيلك من مكانك.. هيبقى فيه تكريم من وزير التعليم وهخليك بس تتفرج على صورتك ومكانتك بعد ما غلطت وتجاوزت وهزيت صورة المنصب فأنا هخليك تتهز انت شخصيا كرسالة ليك ولغيرك.. مثال: المدير إللي انت أقلته من منصبه مش هيمشي من منصبه (وده مؤكد ومتحاولش تكذبني).. المديرة اللي أهنتها على الهواء هتتكرم.. المديرة اللي قولت إنها مدفعتش لأ طلعت دفعت وبتتكرم علشان دفعت.. لأ والوزير طلع قالها: كرامة المعلم خط أحمر.. والكلام ده رسالة من الدولة برضو.. وده معناه إيه: متعملهاش تاني انت أو غيرك علشان مش هنسمي عليك ولا على غيرك👌 عايز تحاسب حاسب بأدب.. عايز تراقب راقب بأدب.. واللي تعب في البلد يتشال على الراس.. واللي بيعمل جهد يُشكر ويتكرم ويُجبر بخاطره مش يتقل منه بأسلوب وضيع.. إنما مش هبقى بعمل المستحيل كدولة علشان أربى طالب محتاج يتربى علشان بيتطاول على معلم وألاقي محافظ بيقول لمديرة مدرسة: هعلم الطلبة النظافة ازاي وأنا أصلا وسـ خ.
= دي رسالة ردع من الدولة مش رسالة وزير بيكيد محافظ 👌
