جريدة الدائرة الحمراء فى قلب الحدث
مقالات مشابهة
نقله: لبنى نيازي
#أتجوز_إمتى؟!!
اتجوزي لما تحسي إنك ممكن تصحي من أحلى نومة في عز البرد عشان تعمليله كوباية شاي وانتي مبسوطة مش وانتي بتقولي بالسم الهاري..
اتجوزي لما تلاقي نفسك تقدري تستحملي عصبيته وتكشيرته..
اتجوزي لما تلاقي نفسك عايزة تخرجي وتمنعي نفسك من الخروج عشان تقعدي معاه..
اتجوزي لما تحسي إنك تقدري تضحكي على نكتُه البايخة.. وتلاقيها تعجبك..
اتجوزي لما تلاقي نفسك مختلفة معاه في الرأي بس مش عايزة تعبري عن رأيك عشان متضايقيهوش..
اتجوزي لما تلاقي نفسك مستعدة تضحي بشغلك عشان تقعدي في البيت تريحيه أو تسافري معاه لمكان بعيد..
اتجوزي لما تحسي إنك ممكن تطلعي من بيت أهلك اللي عشتي فيه مش أقل من 20 سنة عشان تعيشي معاه..
اتجوزي لما تحسي إنك قادرة تستحمليه زي ما ناعسة استحملت أيوب..
اتجوزي لما تحسي إنك قادرة تتنازلي عن جزء أحلامك وطموحاتك _أو حتى كلها_ عشان تبسطيه..
اتجوزي لما تقدري تتعاملي معاه زي ما بِل كانت بتتعامل مع الوحش في فيلم beauty and the beast
اتجوزي لما تلاقي عندك ابن مخلفتيهوش..
أما أنت عزيزي_الشاب :
اتجوز لما تحس إنها تكفيك عن كل ستات الدنيا..
لما تحس إن أكلها حلو مش لازم يكون زي أكل مامتك.. وإنك تقدر تهزر معاها زي أختك.. وإنك شايفها حلوة أكتر من anne hathaway.. وإنك تقدر تحكيلها أسرارك زي زميلتك في الشغل..
اتجوز لما تشوفها راجعة من برة سودا وطرحتها معوجة ومرهقة وهلكانة وبرضه تشوفها حلوة..
اتجوز لما تحس إنك تقدر تستحملها في حالات اكتئابها ونكدها وزعلها..
اتجوز لما تلاقي نفسك مش فارقة معاك هيه طويلة واللا قصيرة.. واللا تخينة واللا رفيعة.. واللامنكوشة واللا مسرحة..
اتجوز لما تحس إنك تقدر تستحمل رغيها ولكَّها وصداعها حتى لو كانت بتحكيلك عن خط سير عفاف زميلتها من أول ماتصحى من النوم لحد ماتنام بالليل..
اتجوز لما تستحمل غيرتها.. وصوتها العالي ونرفزتها..
اتجوز لما تقدر تشاركها أحلامها وتساعدها تحققها وتشوف نجاحها من نجاحك..
اتجوز لما تلاقي نفسك خايف عليها وبتخاف تجرحها أو تأذيها..
من_الأخر اتجوزوا لما تلاقوا روح تستريحولها..
الرسول عليه الصلاة والسلام بيقول: ” الأَرْوَاحُ جُنُودٌ مُجَنَّدَةٌ ، مَا تَعَارَفَ مِنْهَا ائْتَلَفَ ، وَمَا تَنَاكَرَ مِنْهَا اخْتَلَفَ ”
بعد ما فكرت في كل ده لاقيت إجابة سؤال (اتجوز ليه؟!!)
اتجوز عشان تزيد أسباب سعادتي..
الجواز من وجهة نظري وسيلة لتحقيق السعادة مش هدف..
الجواز #سكة_سفر لازم نسافر فيها واحنا مطمنين ومستريحين.. عشان محدش يقدر يرجع المسافة اللي مشيها من أول وجديد..
