جريدة الدائرة الحمراء فى قلب الحدث
مقالات مشابهة
عجبنى بوست Ahmed Hafez
“ده منظر طلبة في الشهادة الإعدادية بمحافظة أسيوط بعد انتهاء الامتحان.. عدد غير معقول بيضربوا في بعض ضرب مميـ ت.. مش مشاجرة عادية.. ولا حد قادر عليهم ولا عارف يسيطر عليهم.. ده ليه!! لأنهم مش معتبرين إن المدرسة ليها هيبة.. ولا المعلمين ليهم هيبة.. ولا إدارة المدرسة ليهم هيبة.. ولا لائحة الانضباط والعقوبات ليها قيمة.. ولا خايفين من حد ولا هايبين حد ولا في دماغهم حد.. ده ليه برضو: لأن الأهل لا ربت ولا عرفت تربي ولا عايزة تربي.. لأن البلطـ جة بقت عند بعضهم هي الحل.. إنهم تبقى الأقوى والأكثر سيطرة.. نخنوخ في نفسك.. وأي حاجة تسقط قدام إنك تبقى مراهق ليك شنة ورنة.
ده مشهد متكرر.. لكن الفيديو بتاع الواقعة دي مؤسف لأقصى درجة.. تخيل دول لو معلم منعهم من الغش هيعملوا إيه.. رئيس لجنة شد على اللجنة.. معلم حاول يعنف طالب منهم!.. هل دول ينفع يكملوا امتحانات وينجحوا؟! تبقى مصيبة وكارثة وتشجيع ممنهج على نفس السلوك.. دول لازم يسقطوا ويعيدوا السنة ويتمسكوا يتربوا ويدخلوا أحداث ويتعلموا الأدب ويرجعوا.. ولو متعلموش ميرجعوش.. ويكونوا عبرة.
النوعية دي مشروع طالب بلطـ جي ولما يكبر هيبقى زعيم عصابة.. ده طالب مش عايز تعليم ده عايز تربية الأول لأنه كارثة على المجتمع كله.. يتحاكم بقوانين مكافحة البلطـ جة ويتاخد ويتحط في الأحداث ويتعمل له إعادة ضبط وتربية وسلوك.. ويا يرجع بني آدم من جديد يا يفضل كدة في تربية عسكرية لحد ما يعرف إن الله حق… وفي انتظار تحرك وزارة الداخلية زي ما عودتنا تجيبهم من قفاهم.
احنا قدام جيل في منتهى الخطورة.. والعقاب بالفصل من المدرسة مكافأة.. اللي زي ده لازم يدخل أحداث وميقعدش في بيته.. ده يتفصل سنة وياخد السنة دي أشغال شاقة.. يتربى تربية عسكرية.. علشان نقدم رسالة للجيل اللي طالع ده: يا تلتزم يا الدولة تربيك.”
وعجبنى أكثر تعليق عصام معروف
” عارف ليه العيال دي لوشافت عسكري شغال بالاعدادية أو أمين شرطة ماتقدرش تتنفس ولا تعمل نص اللي عملته ؟
علشان الحكم دين
علشان الدولة وضعت قوانين لحماية فرد الأمن أعلى من حماية المدرس
علشان العسكري ماسك سلاح والمدرس ممنوع يمسك مسطرة حتى للتهديد
علشان المدرس مفضوح من الاعلام والصحافة والمجتمع لو عمل حاجة غلط وكأنه مطلوب منه يبقى نبي مايغلطش
علشان مرتبه الزهيد مش مخليه محترم بين الناس لأن أغلبنا بيحكم بالمظاهر
علشان من أمن العقوبة أساء الأدب.. واحنا آخر حاجة نعملها مع المدرس هيا الحفاظ على كرامته كبني آدم”
ومش هقدر اعلق غير ب” ربنا يستر من اللي جاى”
