= طالبة اتخرجت من كلية علوم ومع نفسها قررت تدّي دروس خصوصية ومن كثرة الإقبال عليها استعانت ببودي جاردات تنظم لها السناتر وتمشي معاها في الرايحة والجاية، فالداخلية قبضت عليها “لانتحال صفة معلم”.. حضرتك معترض على واقعة ضبطها ليه؟. حضرتك عادي عندك إن أي حد يشتغل معلم؟. هو كل واحد خريج كلية معينة ينفع يشتغل في المهنة كدة من تاني يوم؟. حضرتك بتدافع عنها تحت مسمى إيه؟. معلمة؟. لأ هي مش معلمة.. درست المنهج وتخصصت فيه علشان تتكلم فيه للطلاب؟. لا.. هتقولي بس نجحت علشان كده الطلبة راحت لها.. هقولك مهو “سمكري البني آدميين” كان شغال في العلاج الطبيعي وهو عاطل،وفاتح عيادة وعنده سكرتارية والناس اقتنعت بيه وكانت بتتخانق عليه لحد ما تسبب في عاهات.. مش معقولة تكون رافض تحول التعليم إلى بيزنس وضد المتاجرة بولادك وفي نفس الوقت تدافع عن اللي عملوا من التعليم بيزنس وقرروا مع نفسهم يكونوا معلمين أجيال.
= بنفس منطق الدفاع عن معلمة البودي جاردات، هتكلم في موضوع الغش في الامتحانات.. وهسأل سؤال صعب: احنا كأولياء أمور عملنا إيه علشان نمنع ظاهرة الغش؟. عملت إيه علشان تربي ابنك ميكونش غشاش؟. إيه المبادئ اللي حضرتك أنشأت ابنك عليها؟. هل لما وزارة التعليم مانعة الطالب من دخول التليفون لجنة الامتحان اتكلمت مع ابنك وقلت له متاخدش التليفون معاك؟. جيت في مرة عرفت إنه غش وعنفته؟. لما بتصرف طول السنة دم قلبك على ابنك في دروس ومصاريف ويجي في الآخر يغش وياخد درجته بالتزييف والاحتيال، ياترى حضرتك مبسوط؟ ولا المفروض تصر على إنك تعرف مستواه الحقيقي؟.
= ليه مش بنحمل نفسنا جزء من المسؤولية.. حضرتك بتصرف ليه على ابنك لما هو مقرر ينجح بالغش وبأقل مجهود؟. هل الغشاش ده له مستقبل؟. ولا اللي اعتمد على نفسه وكافح واجتهد؟. لو نجح في الإعدادية بالغش ودخل ثانوية هيقع.. ولو نجح في الثانوية بالغش ودخل كلية هيجي عند مرحلة معينة ومستحيل يكمل بعدها.. ولو نجح في الكلية بالغش واتخرج مش هيشتغل إلا بمجهوده.. علموا ولادكم كده.. علموهم إن اللي بينجح بالغش مستحيل هيكمل مسيرته لأنه هيقع طالما ربنا عادل ومستحيل ينصف غشاش على مجتهد.
= آسف لو صدمتت حضرتك بالحقيقة.. لكن في النهاية ده رأيي يحتمل الخطأ قبل الصواب.
جريدة الدائرة الحمراء فى قلب الحدث
