جريدة الدائرة الحمراء فى قلب الحدث
مقالات مشابهة
نقله: عايدة مصطفى
– *سؤال*
يعنى ايه مبادرة مصر الرقمية
– *جواب*
دى مبادرة مجانية واتفاقية بين وزارة التربية والتعليم ووزارة الاتصالات. يستهدف فيها طلاب المدارس وفيها هيتعلمو برمجه وذكاء اصطناعي وحاجات تانى كتير لمده ٦ أشهر خمسه منهم أثناء الدراسة وشهر فى الاجازه وماتخافش مفيش اى تعارض بين دراستك وامتحاناتك وبيت التدريب بالمبادرة
كمان ٧٥% من التدريب هيكون اونلاين و25% فى مراكز تابع لوزارة الاتصالات
– *سؤال*
المبادرة دى كانت من فترة والطلاب قدمت عليها هل ده صح ؟
– *جواب*
صح
– *سؤال*
طيب ليه التقديم تانى دلوقتى
– *جواب*
دى عبارة عن دفعه استثنائية ب تتم فى 19 محافظة فقط على مستوى الجمهورية من ضمنهم محافظة بنى سويف
– *سؤال*
طيب ينفع أقدم عليها انا دلوقتى تاني
– *جواب*
لو حضرتك قدمت واشتركت في المبادرة مش هينفع تقدم تانى
– *سؤال*
طيب لو كنت قدمت وما اخدونيش عشان كان عندى قصور فى حاجات كده
– *جواب*
لو كنت قدمت قبل كده ولم يتم قبولك برضو مش هينفع تقدم تانى
– *سؤال*
انا مدرسة خاصة ينفع أقدم فى المبادرة
– *جواب*
المبادرة فى العموم بتاخد جميع انواع المدارس لكن لكونها دفعهة استثنائية فقاصرة فقط على مدارس التعليم ثلاث انواع فقط حكومى وتجريبي وقومى
– *سؤال*
انا صف اول ثانوى عام تعليم حكومى ينفع اشترك فى الدفعة الاستثنائية دى
– *جواب*
للاسف برضو الدفعة الاستثنائية قاصر على المرحلة. الإعدادية من الصف الاول الاعدادي الى الصف الثالث الاعدادي
– *سؤال*
ايه الشروط الأخري للاشتراك في المبادرة أو الدفعة الاستثنائية دى
– *جواب*
بالإضافة إلى الشروط ال كتبتها فوق لازم حضرتك تكون متفوق دراسيا فى المواد الآتية (اللغة الإنجليزية والعلوم والرياضيات) للعام الماضي حد أدنى 90%
– *سؤال*
وايه كمان
– *جواب*
أن تمتلك اساسيات المهارات التكنولوجية ولديك القدرة على التعامل مع الحاسب الالي
و أن يكون لديك جهاز حاسب الي متصل بشبكة الإنترنت
– *سؤال*
طيب تمام ازاى بقه اشترك
– *جواب*
هو ده السؤال الصح
مبدءيا كده يتم التسجيل داخل المدرسة من خلال استيفاء ملف اكسيل وملف وورد مبعوت للمدرسة من خلال مركز التطوير التكنولوجي بالإدارة ال حضرتك تابع ليها
مبعوت بشكل نشره رسميه
– *سؤال*
ها وبعدين انا هعمل ايه بقه
– *جواب*
المطلوب من حضرتك بعد ما يكون منتطبق عليك الشروط تقول لمنسق المبادرة بالمدرسة عندى الرغبه في الاشتراك في المبادرة
– *سؤال*
ها وبعد ما اروح
– *جواب*
هو بقه هيجمع بيانات كل بيانات الطلاب ال زيك راغبين فى الاشتراك فى ملف اكسيل وزييه بالظبط ملف وورد
– *سؤال*
حلو اوى ايه بقة البيانات ال هيحتاجها منى منسق المدرسة
– *جواب*
اسم محافظتك واسم ادارتك واسم مدرستك ونوع المدرسة حكومي ولا تجريبي ولا قومي
واسمك طبعا رباعى أو خماسي
وكود المدرسة ال هو الكود الإحصاءى
والنسبة المئوية لدرجات فى العلوم واللغة الإنجليزية والرياضيات
والرقم القومي بتاعك ورقم موبيل ولي امرك
والصف الدراسي بتاعك
كل ده هيتكتب فى الملفين الوورد والاكسبل زى بعض تماما
– *سؤال*
طيب ليه ملفين اكسيل وواحد وورد
– *جواب*
ملف الوورد عشان بعد ما يخلص يطبعه ويعتمده ويختمه من مدير المدرسة وملف الاكسيل عشان سهولة التعامل مع البيانات ومرونه نسخها
– *سؤال*
حلو اوى بعد ما منسق المدرسة يملى الكشوف والملفات دى ايه ال هيحصل تانى
– *جواب*
مع أن ده مش دورك لكن أنا هجوابك عشان انت شاطر وعندك حب استطلاع ومتفوف دراسيا
دور منسق المدرسة بعد ما يجمع البيانات فى الاكسيل والورود وبعد ما طبعا الوورد واعتمده هيروح الإدارة التعليمية التابع لها المدرسة ويسأل عن مركز التطوير التكنولوجي هناك ويسلمه الورقة المطبوعة وملف الاكسيل ولازم يكون عامل تسمية لملف الاكسيل باسم المدرسة
– *سؤال*
معلش غلبتك معاي
منسق المدرسة هيعمل ايه بعد ما يسلم ملف الاكسيل والملف المطبوع لمتسق الإدارة
– *جواب*
مع أن برضو ده حاجه بعيد عن اختصاص وبعيده عن اختصاص منسق المدرسة لكن أنا هريحك واجاوبك
منسق الإدارة بعد ما يستلم من منسق المدرسة الملف المطبوع وملف الاكسيل هيعمل إيه
هقولك يعمل ايه
هيطابق الاتنين ببعض لو تمام
هيعمل ايه بقه
هقولك بس الصبر
هيروح يسحب الملف المطبوع على الاسكانر
عارف طبعا اكيد يعنى ايه اسكانر
بصورة واضحه جدا والختم واضح
وبكده يكون عنده ملفين ملف اكسيل وملف (بي دى اف)
الملفين دول بقه كل واحد منهم بحمل اسم المدرسه وبعد كده هيحطهم فى مجلد برضو يحمل اسم المدرسه وهيكرر منسق الإدارة كل الخطوات دى مع كل مدرسة تجيله
– *سؤال*
ها وبعدين يامستر ياعسل انت
– *جواب*
ماشي يابكاش
منسق بقه الإدارة بعد ما جمع كل ملفات المدارس فى نفس يوم التجميع هيبعتهم لمنسق المديرية بالطريقة ال متفق بيها معاه
– *سؤال*
ايه ده هو فيه حاجه اسمها كمان منسق المديرية
– *جواب*
ههههه طبعا دى حاجه لو عرفتوها تبقوا عمداء
– *سؤال*
وايه كمان
– *جواب*
مفيش كمان اسكت بقه
– *سؤال*
والنبي تقول ايه كمان
– بس ياسيدى المديرية هى ليها آليات أخرى مع الوزارة والتعليم الالكتروني بالوزارة لارسال جميع ملفات المحافظة بشكل يومي
– *سؤال*
فيه حاجه تاني أنا هقوم بيها طيب
– *جواب*
هتنتظر لما وزارة التربية والتعليم تبلغ وزارة الاتصالات وتكنولوجيا المعلومات بأسماء الطلاب الراغبين في الاشتراك من خلال الملفات ال اتكلمنا عنها فوق ومن ثم هيتم التواصل بين وزارة الاتصالات وولي امرك عشان يكملو المرحلة التالية وهى مرحلة التسجيل عندهم
– *سؤال*
وايه كمان
-, *جواب*
لا بقه كفايه تعبت ده أخري معاك
الباقي بتاعك انت مع وزارة الاتصالات
ربنا يوفقك يارب
مع خالص تحياتي منسق مبادرة أشبال مصر الرقمية بادارة الفشن التعليمية
سلامه عدلى محمد
