الثلاثاء , 18 يناير 2022
الرئيسية » أقلام وأراء » شوية فضفضة عشان ربنا يكفيكم ويكفينا شر الفقعة

شوية فضفضة عشان ربنا يكفيكم ويكفينا شر الفقعة

كتبه مهندس: محمد الشربينى

شوية فضفضة عشان ربنا يكفيكم ويكفينا شر الفقعة
أول ماعرفت الفيسبوك كان عام 2008 وكان مفيش احلى من كده تواصل اجتماعى — نتكلم مع بعض ونتناقش ونتبادل القفشات والنكات والذكريات الجميلة — لحد اسم الله على مقامك ماحصلت احداث يناير 2011 واتفشخ الفيسبوك ودخل فيه الخبراء الاستراتيجيين والمحللين السياسيين والفقهاء الدستوريين والسادة الثوريين والمكملين والشرعيين ودخل فيه ولاد الناس والعائلات الكبيرة ودخل فيه كل اللى له واللى مالوش واصبح الفيسبوك عبارة عن مجموعة من الابواب اللى تفقع المرارة
الباب الاول — باب للذكرى الخالدة وده بيشمل ذكرى الاربعين وتماما السنة والذكرى الاولى والتانية والثالثة ومفتوح لحد الذكرى الخمسين وبيشمل ذكرى الاب والام والجد والجدة والاخ والاخت والاقارب حتى الدرجة الرابعة والاصدقاء حتى اللى كانت معرفتهم على قهوة الشاكوش
الباب الثانى — باب الكانيولات والجبس وربطة الدماغ والاستموات على السراير واستجداء الدعوات
الباب الثالث — باب استعراض موائد الأكل وشطارة الستات ومعرفة مصطلحات الأكل الحديثة ولايخلو الامر من التلميح بأنهم ولاد ناس من الطبقة العليوى
الباب الرابع — باب الهيافة ويشتمل على خفة الدم والنكات التى اكل الزمان عليها وشرب واستعراض الطعامة والظرافة والملاحة
الباب الخامس — باب ابو العريف والجدل العقيم تحت شعار ودين النبى مانا موافقك على حاجة ولا واصلين مع بعض لأى اتفاق واحنا فاضيين ومفيش اى حاجة ورانا
الباب السادس — باب نجوم المجتمع الجديدة وخناقاتهم وجرينا وراهم من عينة المستشار وشوبير وهانى العتال واتحاد الغم الأزلى المسمى اتحاد الكورة ويشمل ايضا الصور مع الفنانين ونجوم المجتمع تحت شعار أنا واصل ومحدش قدى ولا زيى
الباب السابع — باب ليبيا وسد النهضة ويجتمع فيه خبراؤنا السياسيين ومحللينا العسكريين والمكملين والشرعيين وبتوع الديمقراطية وحرية الرأى — بس للحق الباب ده مفيهش لا فقهاء دستوريين ولا بتوع حقوق الانسان
الباب الثامن — باب المؤمنين الجدد مجددى الاسلام الحديث والذى يشتمل على الدعاء واذكار الصباح والمساء وكل جديد فى عالم الصلاة والزكاة والصيام وحج البيت لمن استطاع اليه سبيلا ونصائح دخول الجنة والبعد عن النار
والباب الوحيد اللى مش عارف أوصل له عشان أقفله هو الباب اللى يجيلك منه الريح سده واستريح.

شاهد أيضاً

نساء فى مرمى النيران

بقلم: د. امال مطر من فترة وانا نفسي اكتب فى الموضوع ده مش عشان هو …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *