السبت , 19 يونيو 2021
الرئيسية » أقلام وأراء » جبر الخواطر

جبر الخواطر

بقلم: زغلول عبيد

‏النهارده بشتري فاكهة..بقوله الفروالة بكام قالي ب 12 جنيه والموز قالي ب 10 جنيه..قولتله ماشي هاتلي ٢كيلو موز و ٢كيلو فراولة..وأنا واقف دخلت ست والراجل قالها ازيك يا أم يوسف إيه الأخبار واخبار ولادك ‏ايه ! قالتله الحمد لله عايشين في نعمه نشكر الله وسألت بكام الفروالة النهاردة..قالها ب ٣جنيه وليكي انتي ٢ كيلو ب ٥ يعني ب ٢ ونص الكيلو والموز زيها انا بصيت عليه وكنت هتخانق معاه..راح غمزلي وشاورلي بايده قالي استني المهم ام يوسف أخدت كيلو فرواله وكيلو موز و دفعت ٥ جنيه وبعد ما مشيت قالي ياسيدي ماتستغربش وأنا مش بغشك دي ست معاها اربع اولاد صغيرين اكبر واحد فيهم عنده ١٥سنه وشغال عند السوبر ماركت اللي قصادي ده وبياخد ٢٠ جنيه وجوزها متوفى كان شغال عامل نظافه معاشه مبيكملش ٤٠٠ او ٥٠٠ جنيه ‏ومطلوب منها تاكل وتشرب وتعلم وتدفع ايجار البدروم اللي ساكنه فيه..وبترفض اي مساعده من حد خالص لو اديتها فلوس مبترضاش تاخدها نهائي وبتقول انا مبسوطه بنعمة ربنا ومش محتاجه الحمد لله ..لما بتيجي تشتري حاجه بقولها على اسعار رخيصه جدآ علشان ابقى عملت خير وتأكل عيالها وتدوقهم الفاكهه مرة في الاسبوع او مرة في الشهر ..وفي نفس الوقت مبكسرش نفسها و احسسها أنها مش بتشحت وعن شرط يا استاذ..اليوم اللي بتجيلي فيه ام يوسف بكسب الضعف في اليوم ده لأن ربك كبير وشايف وبيعوض و جبر الخواطر على الله يااستاذي..وقفت أبصله ومستغرب ونفسي اقوله إنك احسن من ناس كتير قابلتها روح ربنا يكرمك ويعوضك أضعاف وأضعاف …

شاهد أيضاً

السيسى رجل المواقف… دعم ٥٠٠ مليون دولار لإعمار غزة

بقلم: محمد سيف  شاع بين أبناء الأمة العربية والإسلامية خلاف في الرأى حول الطرق التي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *